Inzilh leh Infuih - Zilhna leh Fuihna

Thufing tawi hi a ṭha khawp mai a, amaherawhchu thu tawi te ang chi hi chu, lo la kawi deuh leh uar deuh duh tana dik lo deuha ngaih theih leh sawifiah theih a ni ve fo a.

"Zilh tur, inzilhhau a ṭha," han tih mai pawh hi - chin nei, awm leh mawi tawk awm, tih dan kawng kalhmang thiam ngai tak te a ni a. Thinchhe deuh, sual deuh, tihtauh hrat deuh, rilru puitling nei lo mi an lo nih phei chuan, leh an mood fuh loh lai te a nih chuan, fimkhur ngai em em mai a ni.

Isuan, "Ui hnenahte thil thianghlim chu pe suh u; vawk hmaahte in tuikeplungte paih hek suh u, an chil chhe hlauh ang a, tin, hawiin an tai thler dah ang che u," a tih ang te pawh hi thil awm thei a ni a. Thil ṭha deuh (zilhna ṭha deuh) pawh hi, kan zilh tumate khan an lo zir ngang loh chuan, "vawk hmaa tuikeplung paih" ang lek a ni thei tlat mai a ni.

A zilh tur kha eng ang ngaihdan nei nge? Eng nge a dinhmun? A dinhmunah kan ding ve chhin tawh em? A rilru puitlin dan eng ang nge? A zilh tumna hi a dik ngei em? A zilhtu chu a mi zahzawng leh ngaihsanzawng a ni em? Nge a lo haw ru hlur zawk? A zilhtu tur chu zilh dan / fuih dan thiam, mi tiphur tura sawi thiam a ni em? etc. chi hrang hrang pawimawh tak tak a awm a.

Naupang te te thleng hian faka fuih phur chi deuh te, tlema han sawi ṭhaih deuh ngai te (thil thleng thei ni si-ah), an awm a.

Zilh ngun leh lutuk pawh hi ninawm leh hneawm, rilru tithlep thei a ni ve tlat a, a awm tawk hriat tur a ni. A ṭha zawk takah chuan - fak anga lang, anmahni tiphur si, an insiam ṭhatna tur hriat chhuahtir tawk si-a sawi dan te hi a awm a, a ṭha em em bawk a ni.

An awm ang ang, ngawi renga en liam mai mai erawh chu a ṭha hauh si lo. Kan zilh hun pawhin, anmahni kan duhsakna te, kan hmangaihna te a lang tur a ni. Hauhna leh anmahni thiam loh va chantir vak vakna lam leh, thinrim aw-kâ-a hauh tun tun aiin, fakna an neihna lai fak a, tihhlim phawt a, an hriat chhuah thiam theih tur tawk tea faknaah khan tihtel thiam a pawimawh.

Zilh tih leh hau (hrawk, vin, thinur hrikthlak, an rilru na vawng vawnga siam tum) tih hi a inang lo va. Zilh emaw kan intih lai hian, zahngaihna tel lovin kan lo sawisa hrep zawk a lo ni thei tlat a ni.

Zilhhauna hi a tuartu tan chuan a na hmâ bik a, tawrh dan kan lo thiam loh phei chuan tawrh dan tur tawk aiin kan lo tuar na mah mah fo ṭhin ve chawk a ni. Chu chu hrethiam la, zilhna na deuh nia lang pawh la na lutuk lo la, dawnsawn dan thiam la, insiam ṭhat zawk theih dan ngaihtuah zel ang che.

Thil ṭha lo deuh mai chu, min zilhtute dik lohna leh an sualna va hmuh leh lo ngaihtuah chhuah ve zung zung te, an sualna leh tlin lohna lo sawi chhuah ve zat zat a, "Nang pawh eng nge i nih bik, chu e, kha e," lo tih ve te hi a ni. Zilh i nih laia hetiang i ngaihtuah emaw, i sawi ve emaw a nih ngat chuan, i ti dik lo chhiava a ni.

Zilhtu che chu mi zilh dan thiam, mi thiam leh sawrkar pawmpui certificate nei thlap an ni kher lo vang, zilh thiam tak hi chu a tlem zawk an ni maithei a:
a na hle ni-a i hriat chuan a nâ a ni ang a,
a nâ ni-a i hriat chuan a tawk a ni ang,
tiin ngai la, a fuh khawp ang.

Mi dang hrethiam theitu hi kan fak mah mah ṭhin niin a lang. Hrethiamtu nih ṭhatzia ringawt hi kan sawi chamchi a. Min zilh loh vang te, min lainat lem loh vang te, kan tana ṭhahnem ngai lem lo an lo nih vang te pawh a lo ni lek thei.

Min zilh leh min hauh avanga mi dang hrethiam lo mi, mi sual anga kan ngai thla zen a nih chuan kan tisual chhiava a ni. Mahni kan dik loh avanga min zilhtute chu mi dang hriatthiamna nei lova chhuah pawh thil awm thei tak a ni.

Thil reng reng hi - a duh fir deuh te an awm ve ṭhin ngei a, min zilhtu tur awm pawh an awm, mi hriatthiamna nei lo mi an nih hrim hrim vang pawh a ni lo maithei. Hriattiam ngai reng renga awm fo pawh a dik chuang lo.

Kuhva ṭhial te pawh hi mi ṭhenkhat chuan engah mah an ngai lo ang a, mi hriatthiamna an neih tam bik vang pawh a ni em em chuang lo maithei; mi ṭhenkhat erawh chuan kuhva ṭhial ṭhat lohzia an hrilh ang. Zial zuk te pawh hi mi ṭhenkhat chuan engah mah an ngai lo vang, mi ṭhenkhat erawh chuan, "Ehe...! zial i zu a maw? zu tawh reng reng suh," tiin zial zu tawh lo turin an hrilh ang, mi hriatthiamna an neih loh bik vang pawh a ni chuang lo thei.

Chutiang bawkin, thil fel zan lo kan tih fo pawh min ṭha en mai mai an awm ang a, ti tawh lo tura min hrilh ṭhin pawh an awm ang. Zan kan meng rei a, kan tho tlai te; mi dang nena kan inkawm dan te, hun kan hman ral mai mai te, chutiang zelin.

Nungchang ṭha vak lo kan nei te a nih ngai chuan, min zilhtute min zilhnaah hian lawm hliah hliah tur a ni. Min zilh dan erawh a dik chiah lovin a na deuh pawh a ni maithei, keimahni lam kha dawhtheihna leh hriatthiamna kan nei zawk mai tur a ni.

---------------------

Mi dang tu emaw ngaihtuah leh sawi chhan nei deuh chunga anmahni khei deuh hlaka comment chhunzawm ang chi hi tih loh tur a ni. Kan comment tawn laih laih a, "a ruh no no chhuak-ah" tih ang mai a ni ṭhin. Mite rilru kan lo tina hle ṭhin. Mi tu emaw khak leh khei nei lova kan sawi thiam lo a nih chuan ngawih mai hi a ṭha. Like (👍🏻) pek mai hi a tawk.